Water Shortage | پانی کی قلت

بلاشبہ پانی خدا کی بے شمار نعمتوں میں سے ایک عظیم ترین نعمت ہے۔ یہ بھی حقیقت ہے کہ جب تک ہمیں کوئی نعمت میسر رہتی ہو، ہمیں اس کی قدر و منزلت نہیں معلوم ہوتی، مگر جونہی وہ نعمت ہم سے چھن جاتی ہے تو ہمیں ادراک اور احساس ہوتا ہے کہ کتنی بڑی نعمت سے ہم محروم ہو گئے۔ ہمارے معاشرے میں تو انسانوں کے ساتھ بھی ایسا ہی سلوک کیا جاتا ہے۔ جب تک کوئی شخص زندہ سلامت ہماری آنکھوں سے سامنے موجود ہو تو ہم اس کی پرواہ کرنے کی بھی زحمت نہیں کرتے۔ مگر جونہی موت کا پروانہ آتا ہے، ہمیں اس کی نیکیاں، اس کے احسانات یاد آنے لگتے ہیں۔ پھر لمبی چوڑی تقاریر پر مشتمل تقاریب منعقد ہوتی ہیں۔ بھئی، یہی کچھ اس شخص کی زندگی میں کیا ہوتا، اس کا خیال رکھا جاتا تو اس کی نوبت ہی نہ آتی نا۔ خیر۔ بات پانی کی چل رہی تھی۔ پانی کے بغیر تو زندگی نامکمل ہے۔ ہم دن رات بے دریغ اندھا دھند پانی استعمال کرتے رہتے ہیں۔ کوئی دن بھی ایسا نہیں گزرتا جس دن ہم پانی کے بغیر جی سکتے ہوں۔ لیکن تصور کریں۔ اگر آپ کے گھر کے نلکوں میں اچانک پانی آنا بند ہو جائے؟ بالخصوص جب آپ کو شدت سے ضرورت ہو تو آپ کی کیا کیفیت ہوگی؟

مصیبت کے دن:

جی۔ آپ نے سوچ لیا؟ بالکل یہی کیفیت میرے ساتھ پیش آئی۔ جب میں گزشتہ ہفتے گھر واپس آیا۔ یہاں پہنچ کر معلوم ہوا کہ کراچی یونیورسٹی روڈ پر واقع پانی کی پائپ لائن پھٹ گئی ہے، جس سے جہاں ہزاروں گیلن پانی ضائع ہو رہا ہے، وہیں علاقہ کے مکینوں کے لیے بھی مصیبت بنی کہ ان کے گھروں میں پانی آنا بند ہو گیا۔ پائپ لائن کی مرمت کرتے کرتے 8 دن گزر گئے۔ مگر پانی کی ایک بوند بھی گھروں میں نہ آ سکی۔ اب اس دوران نجی ٹینکر کمپنیوں کی چاندنی ہو گئی۔ جو موقع کا فائدہ اٹھا کر پانی مہنگے داموں بیچنے لگے۔ نہ جانے یہ خصلت ہم سے کب دور ہوگی؟ ہم اگلے کو مصیبت میں دیکھ کر اس سے ہمدردی کے بجائے اس کی مصیبت سے فائدہ اٹھانا کب چھوڑیں گے؟ یہ چند دن گزارنا بہت دشوار محسوس ہوئے۔ یقیناً جب آپ ایک ایک قطرہ سنبھال سنبھال کر استعمال کریں گے تو میری کیفیت کو بخوبی جان پائیں گے۔ خیر خدا خدا کرکے پائپ لائن کی مرمت کا کام مکمل ہوا اور ہم نے شکر کا کلمہ پڑھا۔ ہم ایک بہت بڑی آزمائش سے نکلے تھے۔ لیکن ابھی ہم سیراب بھی نہ ہو پائے تھے کہ پانی دوبارہ غائب ہو گیا۔ معلوم ہوا کہ وہ پائپ لائن جو 8 دن کی مرمت کے بعد ٹھیک ہوئی تھی، دوبارہ ایک دوسری جگہ سے پھٹ گئی ہے۔ اب بشمول میرے علاقے کے پورا شہر کراچی اس وقت پانی کی قلت سے دوچار ہے۔ خدا کرے کہ جلد از جلد یہ مسئلہ حل ہو جائے۔

مشکلات کے ساتھ سمجھوتہ:

مجھے ہمیشہ سے اس بات کا احساس رہا ہے کہ ہماری قوم مشکل سے مشکل مسئلہ کا بھی آسان اور سادہ سا حل ضرور تلاش کر لیتی ہے۔ لیکن بسا اوقات ایسے حالات بھی آ جاتے ہیں جہاں مشکل کے ساتھ سمجھوتہ کرنے کے سوا اور کوئی چارہ نہیں ہوتا۔ پانی کی قلت بھی کچھ ایسا ہی مسئلہ ہے۔ اب ہم صاف پانی گھر میں تو بنانے سے رہے۔ اکثر لوگوں نے زمین میں بورنگ کروا رکھی ہے، مگر کراچی کی زمین کے زیادہ تر حصے سے سمندری اثرات کا شکار ہونے کی وجہ سے کھارا پانی ہی برآمد ہوتا ہے۔ سو ایسی حالت میں میٹھا پانی گوہر نایاب بن جاتا ہے۔ اس وقت جبکہ میں بلاگ لکھ رہا ہوں تازہ ترین اطلاعات کے مطابق واٹر کارپوریشن کے حکام کی جانب سے پانی کی 84 انچ ڈایا لائن کا مرمتی کام زور و شور سے جاری ہے۔ شنید یہی ہے کہ رات گئے تک کام مکمل ہونے کے بعد کل دوپہر سے پانی کی معمول کے مطابق فراہمی شروع ہو جائے گی۔ خدا کرے ایسا ہی ہو۔ یہ آزمائش کا وقت ٹل جائے۔ امید یہی ہے کہ مسئلہ حل ہو جائے گا۔

ہمارے لیے پیغام:

میں سمجھتا ہوں کہ ہماری زندگی میں آنے والی ہر آزمائش اور مشکل ہمیں سبق دے جاتی ہے۔ پانی کی قلت کو جو ہم آج تمام تر سہولیات سے آراستہ ہونے کے باوجود بھی زحمت خیال کر رہے ہیں تو سوچیں آج سے کچھ چودہ سو سال قبل، جب پانی کی سپلائی کے لیے کوئی باقاعدہ نظام بھی موجود نہ تھا، نہ ہی صحراؤں میں پانی کا حصول آسان تھا، اس وقت کے لوگوں کے لیے پانی کی نعمت کس قدر بڑی نعمت شمار ہوتی ہوگی۔ یہی وجہ ہے کہ ہمارے پیارے نبی حضرت محمد صلّی اللہ علیہ و سلّم نے فرمایا کہ اگر تم بہتی ہوئی نہر کے کنارے بھی بیٹھے ہو تو پانی کو ضائع نہ کرو۔ آج کل ہمارے معاشرے میں بلاوجہ پانی زیادہ بہانے کا رواج عام ہو گیا ہے۔ چھتوں پر لگی بڑی ٹینکیاں اوور فلو ہوتی رہتی ہیں۔ گھروں میں ہم پانی کا بے دریغ استعمال کرتے ہیں اور ہمیں احساس ہی نہیں ہوتا کہ کس بے دردی کے ساتھ ہم اتنی قیمتی شے کو ضائع کرتے رہتے ہیں۔ ہمیں چاہیے کہ اس کا خاص خیال رکھیں، اور بلا ضرورت پانی نہ بہائیں۔ کیونکہ ماہرین کہہ رہے ہیں کہ پانی کی سطح کم ترین ہونے کی وجہ سے آئندہ چند برسوں میں پانی کا شدید بحران پیدا ہونے کا خطرہ ہے۔ اس بلاگ کا پیغام یہی ہے کہ پانی بچائیں۔ زندگی بچائیں۔