My Besties Kidnapped Me On My Birthday! [ENG-URDU]

ایک یادگار سالگرہ کی رات

زندگی میں کچھ ایسے لمحات، ایسی یادگاریں ہوتی ہیں جو مرور زمانہ کے ساتھ کبھی ماند نہیں پڑتیں، بلکہ پر مسرت یادوں کی کتاب میں روشن ستاروں کی مانند جگمگاتی رہتی ہیں. کل میری سالگرہ کی رات بھی انہی چند غیر معمولی اور خوشیوں کے لمحات میں سے ایک تھی. ایک ڈرامائی، غیر متوقع اور خوشی و مسرت کے جذبات و احساسات سے لبریز رات، جسے میں کبھی بھول نہیں سکوں گا. جو میری زندگی کا ایک قیمتی اثاثہ بن گئی. ہوا کچھ یوں کہ کل یعنی 30 جولائی 2025 کی شب مجھے اچانک "اغوا" کر لیا گیا. مگر آخر کس نے؟ میرے ہی بچپن کے دوستوں نے.

غیر متوقع اغوا

حسب معمول میں اپنی روزمرہ کی مصروفیات میں مگن تھا. مجھے یہ تک یاد نہیں تھا کہ آج میری زندگی کے 25 برس مکمل ہونے جا رہے ہیں. میری سالگرہ کی رات میرے قریب تھی، لیکن کاموں میں اتنا مگن تھا کہ مجھے بالکل یاد نہ رہا کہ میری سالگرہ آنے والی ہے. ایسے کچھ خاص لوگ بھی زیادہ نہیں کہ جو مجھے ایسے مواقع پر سپیشل محسوس کروائیں. سو مجھے نہ کوئی توقع تھی، نہ کوئی تیاری. حتیٰ کہ میرے گھر والوں کو بھی یاد تھا. بس میرے لیے یہ ایک عام سا دن، ایک عام سی رات تھی. مگر آگے جو کچھ ہوا، وہ بیان سے زیادہ محسوس کرنے سے تعلق رکھتا ہے.

ایک خوشگوار سفر کا آغاز

شام کا وقت تھا. موبائل کی سکرین پر میرے بچپن کے انتہائی قریبی دوست اور کلاس فیلو کا میسج جگمگانے لگا. کہنے لگا: "یار! آپ سے ملنا ہے. آج رات" میں نے بھی معمول کی ملاقات سمجھ کر حامی بھر لی. دل میں گمان بھی نہ گزرا کہ وہ اسپیشل میرے لیے اس رات اتنی دور سے سفر کرکے میری زندگی کی سنہری یادیں لکھنے آ رہا ہوگا. وقت گزرتا گیا اور رات کے قریب گیارہ بج چکے تھے۔ اچانک فون کی گھنٹی بجی. کال اٹھائی تو دوسری طرف وہی دوست تھا. کہنے لگا: باہر آجائیں. ہم آپ کا انتظار کر رہے ہیں. کچھ ہی ساعتوں بعد جب میں باہر پہنچا تو وہ میرے ایک اور دوست کے ہمراہ جو کہ میرا کلاس فیلو بھی تھا یعنی ہم تینوں ایک ہی کلاس میں تھے، وہ میرے گھر کے دروازے پر موجود تھے. میں نے ظاہری صورتحال کے مطابق ان کے اس وقت یوں اچانک اکٹھے وارد ہونے کو عجیب سمجھا اور تعجب کا اظہار کیا، کیونکہ میرا خیال تھا کہ وہ اکیلا آئے گا. مگر وہ بغیر کوئی جواب دیے، بغیر کسی تمہید، تمہل اور تأمل کے، مجھے اپنے ساتھ موٹر سائیکل پر بٹھا کر رواں دواں ہونے کو تیار تھے گویا کہ مجھے یرغمال بنانے آئے ہوں. انہوں نے مجھے اتنا موقع بھی نہ دیا کہ میں گھر سے کچھ ساز و سامان اٹھا سکتا. گھر کے سادہ سے کپڑوں میں ہی مجھے اپنے ساتھ موٹر سائیکل پر بٹھا کر نکل پڑے.

سمندر کنارے سکون اور یادیں

دوران سفر ہم نے مل کر طے کیا کہ شہر کے شور شرابے سے کہیں دور تازہ کھلی فضا میں چلتے ہیں. کراچی کا موسم بھی بہت ہی زبردست تھا. ہلکی پھلکی پھوار بھی پڑ رہی تھی. سو ہم نے سمندر کے کنارے سی ویو کے تفریحی مقام پر چلنے کا پلان بنایا. میں سارے راستے ہی حیران ہوتا رہا کہ آخر کیسے میرے دوست نے مجھے اس دن یاد رکھا اور میری سالگرہ کو جس طرح سے دونوں نے مل کر سپیشل بنایا. میرا دل احساس تشکر سے لبریز ہوا جاتا تھا. میں اتنا خوش تھا کہ میں الفاظ میں اپنی خوشی بیان نہیں کر سکتا. شاید میرے گھر والوں کو بھی میری سالگرہ یاد نہیں تھی مگر میرے دوست نے اس رات کو میرے لیے بہت زیادہ سپیشل بنا دیا. مجھ سے پوچھا گیا کہ کہاں چلیں تو میں نے کہا: تازہ فضا میں کچھ لمحات گزارنا چاہتا تھا. گوکہ میرے گھر سے سمندر کافی زیادہ دور تھا، اور بائیک پر یہ سفر مزید دشوار گزار ہو جاتا ہے. مگر گھنٹہ بھر کی مسافت طے کرنے کے بعد آخر کار ہم سمندر کے کنارے پر موجود تھے. رات کی ٹھنڈی ہوا، شور مچاتا سمندر، اونچی نیچی لہریں، ایک طلسماتی منظر تھا جو کہ میری زندگی کے چند ناقابل فراموش خوشگوار لمحات میں سے ایک تھا. کافی دیر ہم نے ساحل سمندر پر ہوا خوری کی. جی بھر کے انجوائے کیا. کئی تصاویر بنائیں اور ان لمحات کو یادگار بنانے کے لیے کیمرہ میں قید کیا. پرانی یادیں تازہ کیں. خوش گپیاں کیں. اور وہ تمام باتیں کیں جو کبھی اسکول کے بینچوں پر رہ گئی تھیں. گھنٹہ بھر لطف اندوز ہونے کے بعد ہم واپسی کے لیے نکلے.

ایک یادگار سرپرائز پارٹی

اب انکشاف یہ ہوا کہ میرے دوستوں نے پہلے سے ہی میرے لیے سرپرائز پارٹی بھی تیار کر رکھی تھی. یہ میرے لیے اور بھی خوشی کا باعث تھا. ایک طویل سفر کے بعد بالآخر ہم مشہور ریسٹورنٹ پزا میکس پر موجود تھے، جہاں میرے دوستوں نے میرے لیے سپیشل پارٹی پزا تیار کروایا، بالکل میری پسند کے عین مطابق، خوبصورت سجاوٹ اور ایسا ذائقہ جو شاید میں نے کبھی نہ چکھا ہوگا. میں گزشتہ 15 سالوں سے پزا میکس پر جا رہا ہوں مگر کل رات کے پزے کا ذائقہ اور مزہ بالکل ہی الگ اور غیر معمولی تھا. چونکہ وہ جانتے تھے کہ میں پزا لور ہوں اس حساب سے انہوں نے میری پسند کے عین مطابق بالکل میرا فیورٹ فلیور پزا آرڈر کیا. ہم نے کھانے کی میز پر بھی بہت ساری باتیں کیں، اسکول کے قصے چھیڑے، اساتذہ کی باتیں کیں، ایک دوسرے کی شرارتیں یاد کیں، اپنے پرانے سکول کے دن یاد کیے اور بہت زیادہ انجوائے کیا. میں بہت بہت زیادہ خوش تھا.

دل سے دل تک کے لمحات اور رخصت

باتوں ہی باتوں میں کب رات کے ساڑھے تین بج گئے پتہ ہی نہیں چلا. چونکہ دونوں دوستوں نے صبح جاب پر جانا تھا سو ہم نے اپنی خوشیوں بھری رات کو یہیں بریک لگایا اور وہ مجھے ڈھیر ساری دعاؤں، نیک خواہشات اور تمناؤں کا اظہار کرتے ہوئے اپنے گھروں کو روانہ ہوئے. میں نے سوچا: واقعی، مجھے آج رات اغوا کر لیا گیا تھا، محبت کے ہاتھوں. مجھے احساس ہوا کہ زندگی میں اچھے دوستوں کا ہونا کس قدر ضروری ہے. میں خوش قسمت ہوں کہ میرے پاس ایسے دوست ہیں جو صرف ساتھ نہیں نبھاتے، بلکہ میری زندگی کے خاص لمحوں کو اور بھی خوبصورت بنا دیتے ہیں. میری دعا ہے کہ اللہ پاک ہماری یہ دوستی، یہ محبت، یہ بھائی چارہ، یہ اتحاد، یہ جذبات سلامت رکھے. آمین.