Pitfalls of Social Pranking | سوشل پرینک کے نقصانات

سوشل میڈیا نے جہاں لوگوں کی باہمی رابطہ کاری میں سہولت دی ہے وہیں پر خاص و عام کو ایک ایسا پلیٹ فارم بھی مہیا کر دیا ہے جہاں وہ اپنے نت نئے کارناموں کے ذریعے بآسانی مشہور ہو سکتے ہیں. روز اول سے ہی انسان فطری طور پر مشہور ہونے کا خواہاں رہا ہے. بڑے بڑے اداکار اور معروف کلاکار اپنی شہرت کی خاطر ہی دن رات ایک کرکے محنت کرتے رہے. پھر یہ شہرت یا تو اچھے اور مثبت کاموں کے ذریعے سے حاصل کی جاتی ہے یا پھر بقول مرزا غالب:
بدنام اگر ہوں گے تو کیا نام نہ ہوگا؟
شہرت کے لالچی لوگ اوچھے ترچھے کسی بھی قسم کے ہتھکنڈے آزمانے سے باز نہیں آتے جس کے ذریعے وہ مشہور ہو سکیں. اب مثبت اور تعمیراتی کام کرنا چونکہ ذرا مشکل کام ہے اس لیے دیکھنے میں یہ آ رہا ہے کہ ہماری نئی جنریشن بہت تیزی کے ساتھ تخریب کاری کی جانب مائل ہوتی چلی جا رہی ہے. صرف اپنی مشہوری کی خاطر وہ کسی کو نقصان پہنچانے سے بھی دریغ نہیں کرتے.

زیادہ ویوز کی خواہش:

شہرت حاصل کرنے کے بے ڈھنگے طریقوں میں سے ایک طریقہ پرینک ویڈیوز کا بھی ہے. جس کے نقصانات کی جانب میں آپ کی توجہ مبذول کروانا چاہتا ہوں. آج کل آپ سوشل میڈیا پر بکثرت یہ دیکھیں گے کہ کوئی یوٹیوبر، کوئی ولاگر یا کوئی بھی کانٹینٹ کری ایٹر اپنی ویڈیوز پر زیادہ ویوز حاصل کرنے کے لیے کوئی ایسا کام کرتا ہے جس کی وجہ سے لوگ اس سے محظوظ ہو کر اس کی ویڈیو دیکھیں. پھر چاہے جس کے ساتھ یہ مذاق کیا جا رہا ہو، اس پر کتنا ہی گراں کیوں نہ گزرے. آپ مشاہدہ کر سکتے ہیں کہ جہاں کسی شخص نے تعمیراتی کام کیا. دس دس گھنٹے محنت کرکے ریسرچ کرکے ایک 5 منٹ کی ویڈیو اپلوڈ کی اسے بمشکل چند ہزار لوگ دیکھ پاتے ہیں مگر جونہی کوئی فن کار راہ چلتے راہ گیروں کے ساتھ مذاق کرکے انہیں ڈرا دھمکا کر، کبھی تھپڑ لگا کر، کبھی شاپر چڑھا کر، کبھی کچھ گرا کر، کبھی باجا بجا کر دس پندرہ منٹ کی ویڈیو چڑھا دے تو لاکھوں لوگ اسے دیکھنے کے لیے امڈ آتے ہیں.

کیا مزاحیہ ویڈیوز بنانا غلط ہے؟

مزاحیہ ویڈیوز کے ذریعے لوگوں کی طبیعت خوش کرنا، اس فکر و پریشانی کے دور میں کسی کے چہرے پر مسکراہٹ کی وجہ بننا بالکل بھی غلط نہیں. لیکن مزاحیہ ویڈیوز کی بھی اخلاقی حدود و قیود ہونی چاہیے. بہت سے پاکستانی ایکٹرز جنہیں میں بچپن سے فالو کرتا آ رہا ہوں، بہت اچھا اور عمدہ کانٹینٹ بناتے ہیں. اس میں کسی قسم کا لچر پن، بے ہودگی یا بے حیائی نہیں ہوتی. آپ انہیں فیملی میں بیٹھ کر بھی دیکھ سکتے ہیں. اب بھی ایسے لوگ موجود ہیں اور اچھی خاصی شہرت بھی پا چکے ہیں. لیکن جب آپ مزاح کے نام پر اخلاقی حدود کی پامالی کرنے لگتے ہیں، کسی کی عزت نفس متاثر کرتے ہیں، کسی کا دل دکھاتے ہیں یا کسی کا سر راہ مذاق اڑاتے ہیں تو درحقیقت مذاق اس کا نہیں بنتا بلکہ آپ کی شخصیت لوگوں کے سامنے آتی ہے.

ایک چھوٹی سی غلطی:

بسا اوقات مذاق مذاق میں کی گئی چھوٹی سی غلطی انسان کو بہت بھاری پڑ جاتی ہے. میں نے دو دن قبل ہی کراچی کے علاقے ناظم آباد میں رہنے والے ایک نوجوان کی ویڈیو دیکھی جو اپنے گھر کا اکلوتا کمانے والا ہے. اس کے والد کا انتقال ابھی پچھلے سال اکتوبر کے مہینے میں ہوا. وہ کالج کی تعلیم مکمل کرنے کے بعد اب ساتھ ساتھ یونیورسٹی پڑھ رہا ہے اور ساتھ ہی ساتھ کاروبار بھی کر رہا ہے تاکہ اپنی ماں اور بہنوں کی کفالت کر سکے. جیسا کہ آپ کے علم میں ہے کہ پاکستان کے شہر کراچی کی صورتحال امن کے حوالے سے دگرگوں ہی رہتی ہے. آئے دن کوئی نہ کوئی ڈکیت، کہیں واردات، چوری ڈکیتی حتیٰ کہ قتل کی خبریں بھی چلتی رہتی ہیں. جن کے ساتھ یہ واقعات پیش آتے ہیں، ان کی تو دنیا ہی اندھیر ہو جاتی ہے. مگر جن کے ساتھ اب تک ایسا سانحہ نہیں پیش آیا ہوتا وہ اسے مذاق سمجھتے ہیں. یہی کچھ اس کراچی کے نوجوان کے ساتھ بھی ہوا. اس کے دوستوں میں کسی دوست نے میم بنا دی کہ یہ شخص ڈاکو ہے. اسے پکڑنے میں ہماری مدد کریں. دیکھتے ہی دیکھتے پوسٹ وائرل ہو گئی. پولیس اسٹیشنز میں، تھانوں کچہریوں میں بھی بات پہنچ گئی. عوام تو یوں بھی آج کل بپھری ہوئی ہے. وہ بلاتحقیق ہی ایسے لوگوں کو محض شبہہ کی بنیاد پر جان سے مار دینے پر تلے ہوئے ہیں. ایسی صورتحال میں اس لڑکے کے لیے اب تو گھر سے نکلنا مشکل ہو گیا ہے. گزشتہ دو ہفتوں سے یہ لڑکا اپنے گھر میں محصور ہے.

سوشل میڈیا بے لگام ہے:

آپ نے ملاحظہ کیا کہ کس طرح ایک لڑکا اور اس کا پورا خاندان زندگی اور موت کی کشمکش میں مبتلا ہو کر رہ گیا. اسے ہر آن یہ ڈر رہتا ہے کہ کہیں وہ باہر نکلا اور کسی اندھی گولی سے اس کا سامنا ہو گیا تو اس کے پیچھے روتی ماں اور بہنوں کا کیا بنے گا. اس کی فریاد کرتی ماں گزشتہ کئی راتوں سے مصلیٰ پر پڑی رو رہی ہے. جن دوستوں نے مذاق میں یہ شرارت کی تھی. وہ تو اب پشیمان ضرور ہوں گے. مگر اب پچھتاوے کیا ہوت. جب چڑیاں چگ گئیں کھیت. سوشل میڈیا پر اگر آپ نے کوئی پوسٹ ایک دفعہ چڑھا دی، اس کے بعد وہ آپ کے اختیار سے باہر ہو جاتی ہے. لوگ دھڑا دھڑ اسے شئیر کرتے جاتے ہیں. اپنے پاس محفوظ کر لیتے ہیں. پھر آپ چاہ کر بھی وضاحت نہیں کر پاتے نہ ہی اپنی پوسٹ کو ختم کر سکتے ہیں. اس لیے سوشل میڈیا پر کچھ بھی لکھنے، کچھ کہنے، کچھ دکھانے سے قبل سو مرتبہ سوچنا چاہیے. آیا یہ مواد جو میں اپلوڈ کر رہا ہوں یہ میرے لیے یا کسی اور کے لیے وبال جان تو نہیں بن جائے گا؟ اس کے استعمال میں بہت زیادہ احتیاط کی ضرورت ہے.

مثبت اور تعمیراتی کاموں میں استعمال:

میری تحریر کا مقصد ہرگز یہ نہیں ہے کہ آپ سوشل میڈیا کا استعمال ترک کر دیں. آپ ضرور سوشل میڈیا استعمال کریں. آزادی رائے کا اظہار کریں. اپنے خیالات دنیا تک پہنچائیں مگر اخلاقی ضوابط کے دائرے میں رہتے ہوئے یہ کام کریں. لوگوں کی زندگیوں کو تکلیف سے بچائیں. اگر آپ نے سوشل پرینک کرنا ہی ہے تو آپ زبانی کلامی بھی کر سکتے ہیں. کسی کو غصہ دلا کر، تھپڑ لگا کر یا کسی کو زمین پر گرا کر اس کا مذاق اڑانا اور پھر دنیا بھر میں اس کا چرچا کرنا انتہائی اخلاق سے گری ہوئی حرکت ہے. اس کے علاوہ اس میں یہ خطرہ بھی ہے کہ اگر خدانخواستہ گرنے والے کے پاس اسلحہ ہوا اور اس نے طیش میں آ کر آپ پر فائر کر دیا تو اس کا ذمہ دار کون ہوگا؟ آپ کی ذرا سی تفریح کسی کے لیے بھی حتیٰ کہ آپ کی ذات کے لیے بھی جان لیوا ہو سکتی ہے. اس لیے تمام کانٹینٹ کری ایٹرز کو ضرور توجہ کرنی چاہیے کہ وہ عوام کے سامنے کیا پیش کر رہے ہیں. آپ منفی اور تخریبی سرگرمیوں کے بجائے مثبت اور تعمیری کام بھی تو کر سکتے ہیں. آپ لوگوں کی مدد کر سکتے ہیں. آپ لوگوں کے مسائل کو اجاگر کر سکتے ہیں. آپ کسی مظلوم کی آواز بن سکتے ہیں. آپ کسی ٹیلینٹ کو منظر عام پر لا سکتے ہیں. آپ کسی مایوس شخص میں نئی امید کی کرن جگا سکتے ہیں. آپ کو اگر اللہ تعالیٰ نے صلاحیت دی ہے تو اسے مثبت اور تعمیراتی کاموں میں استعمال کیجیے.

میری درخواست:

کہنے کو تو میں درجنوں ایسی مثالیں ذکر کر سکتا ہوں جو ہمارے معاشرے میں پرینک کے نام پر رواج پا چکی ہیں. مگر میرے نزدیک مقصود شخصیات کا تنازعہ کھڑا کرنا نہیں ہے. میرا مقصد اور پیغام بس اتنا ہے کہ تھرڈ کلاس کانٹینٹ سے باہر نکل کر کوئی تعمیراتی کام کریں. لوگوں کی ذہن سازی کریں. ٹیکنالوجی پر ریسرچ کریں. اپنے خیالات کا اظہار ضرور کریں. مگر اخلاقی حدود کی پامالی کے مرتکب نہ ہوں. لوگوں کا سہارا بنیں. ان کی تضحیک اور تذلیل نہ کریں بلکہ ان کی مدد کریں، ان کے کام آئیں تاکہ لوگوں کے دلوں میں آپ کی عزت پیدا ہو. وہ اگر کہیں پبلک میں آپ سے ملاقات کریں تو آپ کو گالی نہ دیں بلکہ آپ کو سلام پیش کریں. اپنا بھی وقت قیمتی بنائیں اور لوگوں کا بھی. لوگوں کے چہروں پر وجہ مسکراہٹ بنیں. ان کے دلوں میں وجہ نفرت نہ بنیں. خوش رہیں اور مسکراہٹیں بکھیرتے رہیں.