Hive-engine / Binance-Myanmar နှင့် USTD

မဂ်လာပါ။

ယခုရက်ပိုင်းသည် ကျွန်တော်များ Hive ပလက်ဖောင်းတွင်သာမက မြန်မာပြည်ရှိ Crypto သမားများပါ လှုပ်လှုပ်ရှားရှားဖြစ်စေသော နေ့ရက်များဖြစ်ကြသည်။

Hiveပလက်ဖောင်းတွင် လှုပ်လှုပ်ရွရွဖြစ်ရခြင်းမှာ ပထမအချက် Crypto Currencyများ၏ ဈေးနှုန်းများ သိသိသာသာကျဆင်းလာခြင်းပင်၊ ထိုမှတဖန် ဆက်စပ်တိုကင်များ၊ ကွိုင်များ၏ ဈေးနှုန်းများသည်လည်း တရိပ်ရိပ်လိုက်လံကျဆင်းလာခြင်းကြောင့်ပင်။ ထိုသို့ တိုကင်ဈေးနှုန်းများ ကျဆင်းခြင်းနှင့်အတူ ဟိုက်အကောင့်များ Rewardရရှိခြင်းသည်လည်း ပြားဂဏာန်းအဆင့်သို့ ရောက်ရှိလာသောကြောင့်ဖြစ်သည်။

( Credit Image Source )

နောက်ဒုတိယအချက်ကတော့ အားကိုးအားထားပြုရသော အဓိကကျသည့် Hive-engine Wallet သည် မည်သည့်အကြောင်းကြောင့် error တက်နေသည်ကို မသိရှိရသေးချေ။ အခုချိန်တွင် Hive Engine Wallet ကို ဝင်ရောက်ကြည့်ရှုပါက အခြားသော new hive-engine . com သို့ လမ်းညွှန်ထားသည်ကို တွေ့နေကြရသည်။

" If you are having problems with hive-engine.com, please use our new full-featured interface at Tribaldex.com. We are working on the new hive-engine.com to be released in Q1 of 2022."

ထိုသို့ အကြောင်းအရာနောက်ကွယ်သည် မသိနိုင်သော အချက်များစွာရှိနေမည်မှာ မလွဲပေ။ ကျွန်တော့အနေနှင့် ဟိုက်ပလက်ဖောင်း၏ လုပ်ငန်းဆောင်တာများအား စေ့ငုသေချာစွာ မသိရှိသေးသည့်အတွက် မည်သို့ဖြစ်သည်၊ ဘယ်သို့ဖြစ်သည်ဟု မဆွေးနွေးရဲပါ။ ဗဟုသုတစုံသော ကိုဟင်ကို ရှင်းပြပေးပါရန် ဤနေရာမှ တောင်းဆိုအပ်ပါသည်။

( Credit Image Source )

မည်သို့ပင်ဆိုစေ ကျွန်တော်များ၏ Hive-engineသည် အသစ်သော new Hive-Engien (Tribaldex) ဖြင့် ဆက်လက်ချိတ်ဆက်ရတော့မည်ဖြစ်သည်။ လာခြင်းကောင်းသော Hive-Engine Walletလေးဖြစ်ပါစေလို့သာ ဘုမသိဘမသိ ကျနော်ဆုတောင်းနေမိသည်။

နောက်တစ်ခုကတော့ ကျွန်တော်များ ပြည်တွင်းရေးနှင့် ဒါရိုက်ပင်သက်ဆိုင်နေသည်။ NUG က USDT အား တရားဝင် လက်ခံလိုက်ခြင်းသည် နိုင်ငံအတွင်းအပြောင်းအလဲတော်တော်များများကို ဖြစ်စေမည်မှာ မလွဲပေ။ အစိုးရတစ်ခု (ဝါ) အစိုးရဖြစ်လာမည့်အဖွဲ့မှ ဤသို့ တရားဝင်လက်ခံသည်ဟု ကြေညာနေခြင်းမှာ ယခင်က ထုတ်ပြန်ထားသော ငွေကြေးဆိုင်ရာ အမိန့်တို့အား လွမ်းမိုးပါယ်ဖျက်လိုသော သဘောပါဝင်သက်ရောက်နေသလို နိုင်ငံခြားငွေကြေး USDကဲ့သို့ Crypto ငွေကြေး USTD များ NUGသို့ စီးဆင်းလာစေရန်ဟုလည်း နားလည်တတ်ကျွမ်းသူများက တွေးတောဝေဖန်နေကြသည်။

ဆက်စပ်အကြောင်းအရာများကို လက်လှမ်းမှီရာတွေးကြည့်လျင် နိုင်ငံခြားအိတ်ချိန်းဆိုက်များဖြင့် ချိတ်ဆက်ထားသော မြန်မာပြည်တွင်းဘဏ်များသည် တစ်စုံတစ်ခုသော အခက်အခဲကို ကျော်လွှားရတော့မည်မှာ သေချာနေသည်။ နောက်တစ်ခုက မြန်မာပြည်တွင်း USDကို ကစားနေသော သူဌေးများမှာ Binance Myanmarနှင့် ချိတ်ဆက်နေသည်ကများသည်။ ထိုအကြောင်းကို စကစ ကလည်းသိနေမည်မှာ မလွဲပေ။ သို့ဆိုရလျှင် USD ပဲဖြစ်ဖြစ် USTD ပဲဖြစ်ဖြစ် NUG ထံ စီးဆင်းမသွားရန် စကစသည် Binanceမြန်မာ နှင့်ချိတ်ဆက်ထားသော ပြည်တွင်းဘဏ်အကောင့်များအား ဆွဲစိလာနိုင်သည်။

နောက်တဖန် ဆက်စပ်တွေးတောရန်မှာ Binanceအား အခြားသောနိုင်ငံများက ဖယ်ကျဉ်လာကြသည့်အကြောင်းကို ဟိုက်မြန်မာအဖွဲ့သားများ သိပီးကြပြီးဖြစ်သည်။ ထိုသို့ဆိုလျှင် အခြားနိုင်ငံအကောင့်ဖြင့် ဖွင့်လှစ်ထားသော Binance အကောင့်များ ငုတ်တုတ်မေ့ရသလို ပဲလှော်ကြားဆားညပ်မည့်ကိန်းဆိုက်မည့် သူများမှာ မြန်မာပြည်တွင်းက USD ကိုင်ကစားနေသော စကစ လက်ပါးစေများ ဖြစ်လာနိုင်သည်။

မြန်မာဟိုက်အဖွဲ့သားများ ခင်ဗျား--အထက်ပါအကြောင်းအရာများသည် ကျွန်တော်တစ်ဦးတည်းမှ ဉာဏ်မှီသလောက် စဉ်းစားဝေဖန်သည့် အကြောင်းအရာများသာဖြစ်ပါသည်။ တစ်စုံတစ်ရာ မှားယွင်းတင်ပြမိပါက ကျွန်တော်၏ ဗဟုသုတအားနည်းချက်သာဖြစ်ပါသည်။

ကျွန်တော်တို့အနေနှင့် နိုင်ငံရေးအလှည့်အပြောင်းတွင် မိမိတို့၏ USTD ပဲဖြစ်ဖြစ် USD ပဲဖြစ်ဖြစ် မည်သို့ ကိုင်တွယ်သုံးစွဲမည်ကိုတော့ သေချာစိစစ် စဉ်းစားဆုံးဖြတ်ကြစေချင်သည်။

မြန်မာပြည်သူများအားလုံး ကိုယ်စိတ်နှစ်ပါး အေးချမ်းကြပါစေ။

@nyimwa
14.12.2021 ; PM : 11:20