RE: Sam's Hangout #72- GENUINE CONNECTION ON HIVE

Me i went to church ooh, basically spent my whole day in church,@sam.hangout i saw your mention but was just calming down because wetin i learn full ground,me nah dedicated Christian 🤗

If you no go church come join sermon.

Topic: In Christ

Anchor scripture nah Matthew 16:15-18

Who Jesus really be na the koko of Christianity. If you dey see Jesus like ordinary man, or you no dey believe say na Him be the Christ, then you go miss the whole point of serving God
According to 1 Corinthians 5:16
We no dey reason people based on human level again, We don jam Christ, and that one don change our mindset, we no dey mix flesh and spirit again na Kingdom mentality we dey run with now.
If you still dey see yourself as ordinary, or dey limit yourself to human level, you go dey operate below your potential and nah you sabi bcos if anything do you no blame God ooh. Jesus no die make you remain like ordinary man,you gatz dey see yourself the way God see you.
The kind result wey you go see as Christian dey depend on your faith. If you believe say you no fit rise, you go remain down.
According to 1 John 5:1–4
Wetin dey overcome the world? Na our faith! No be by gra-gra, na by believing who you be in Christ.
Romans 6:6
Why God fit boldly talk say sin no get power over us again? Because Jesus don handle our sin matter. We don die with Christ, and we don rise with am,trust me sin no get level again.
2 Peter 1:3
God don give us everything we need to live this godly life,we no get excuse again. Christianity no be guesswork,na knowledge be the foundation and na why Hosea 4:6 talk say "My people perish because dem no get knowledge." If you no sabi who God be, and who you be in am, how you wan live like real Christian?

No let wetin devil dey do confuse you. E no be your standard.
The answer to sin na to get correct identity,you gats consciously put off the old man.
Ephesians 4:22
Remove the old character like cloth wey don dirty,na you go consciously do am, Christ don do him part go ooh.

Y'all make una come join service online😂😂
Tell me wetin you learn
@justfavour @rukkie @beckyroyal @merit.ahama @hopestylist @emlynx @kingdomzy @mathewdaddywah @nkemakonam89